مُذَكِراآآتْ طَـالِبَهـ ..~6 "خَمِيس بِنَكْهَةْ اَلْجُمُعَهْ "

اليوم : الخميس ,,,, التاريخ : 22/11/1432 هـ ... الساعه : 9,42 مساءً

اليوم خميييس ,, أحلى شي انك تنام و انت ما وراك شي لا دوام ولا يحزنون هع ... بس اليوم حسيت بشي غريب ما ادري ليش أحس اليوم جمعه مهب خميس ,, هل لأنه اليوم غدانا سمك , و حنا متعودين السمك يوم الجمعه ,, أو لأنه اليوم البيت خموووول ,,

هنوده اختي للحين نايمه , و رورو قاعده ع الايبود ,, و طارق يلعب بالاي باد .. و ابوي و امي وجدتي و عزوز  ,, يشربون شاهي و يتفرجون المباراه  " بحكم أنه أبوي و عزوز هلاليين فمباراه مهمه بالنسبه لهم " ,, و جدي قاعد يكتب بمكتبته ,, وعمي مهب يالبيت ,,

 يانااااااااااس لييه خمووول كذا ابي احد يتحرك يتحمس معي مافييه ,, كلن لاهي ,,آآآف ,,

ما أدري وش أسوي .. ودي اشوف فلم , وودي اذاكر , وودي اروح عرس " شطحه " ,, لكن اليوم من جد ودي ارقص و استهبل لكن محد معطيني وجه ,,. حتى التويتر محد فيه ,, ياالله وش ذا الخمووووووووووووووول

 "آآآه يا سارونه ليتس عندي استهبل انا وياتس ولا نشوف فلم سوا { مرره فاقدتس ومشتافتلتس خيتووو } "

ملاحظة : أنا ما اعرف اشو فلم الا مع سارونه أو هنوده .. لاني متعوده داايم نشوف سوا ,, و نجيب خراابييط و نطفي النوور , و حماس ,,, عشان كذا اذا شفت فلم لحالي احس شي ناقص هع هع هع

شكله مافيه امل الا اني اروح اذاكر اصرف , و اخلي شوفة الفلم اذا قامت هنووده ..

بس فيه شي واحد زين بهالخموول .. أنهىالبيت هاااادي و لله الحمد مافيه ازعاج ,, " هذا أحسن وضع عشان اذااكر "

المصطلحات :

ـ خرابيط : تشيبسات و عصيير و فشار و شوكولاته و كوب كيك  وكلل لوازم الفله 

يالله نشوفكم على خير باتسر .. 

مُذَكِراآآتْ طَـالِبَهـ ..~5 "يَوُمُ النَومُ العَالَمي "

اليوم الاربعاء .. الموافق 21/11 ... الساعة : 9,27 دقيقه صباحاً { وقت الفسحه }

1ـ 

قمت اليوم الساعه 6.31 ,, طبعاً متأخره ع المدرسه نص ساعه الا دقيقه , و بسررعه تجهزت و لبست ,, و نص ساعه و أنا قاضيه  , صارت الساعه 7 الا خمس دقايق , و في ذيك اللحظه سمعت صوت أختي هنوده و هي معصصصصصبه , و السبب انه أختي الصغيرونه داخله تتروش ,, " يعني ما جازله تترو ش الاالساعه سبع الاخمس " ,, و سبب تعصيب هنوده انه عنده الحصه الاولى اختبار مكتبه ... و الحللل؟؟؟ 

,, ابوي راح للدوام هو و عزوز ,, ما فيه الا السواق ,, قامت هنوده  راحت قبلنا ,, و طبعاً أنا يا حسره قعدت أحتري رورو اختي الين تخلص " مرره منقهره منه ودي أعطيه بوقس ,, لأنه له كم يوم باطتن تسبدي ,, تلبس بشويييش آآآآخ "  ,, صاارت الساعه 7.7 و رورو ما خلصت ,, خلاااص هنا أنا وصلت معي ,,, و علمت ماما ,, و طبعاً عرفت من امي سبب ترويش ربا الصبح الا و هو " انه اليوم عنده اجتماع اولياء أمور و توه تذكر حظرته آآآخ  " ...

المهم أنه ما طلعنا من البيت الا الساعه 7,10 ,, و طبعاً مع الزحمة و الاشارات ,, ما وصلت المدرس الا الساعه 7,21 دقيقه

2ـ 

.. و دخلت الحصه الأولى" كانت بالمعمل مهب بالقاعه " , دخلت و انا خايفه من ردة فعل الاستاذه ,, و لكن الحمد لله ما علقت بس حطت اشاره على اسمي " الله يسر ما تنقص " .. وو بس خلصت حصة الفيزياء بسلام .. و كانت حصه حلللوه و الدرس مرره جميل " أصلاً كل دروس الفيزياء زينه " { وحده تحب الفيزياء خخخخ }

و بدت الحصه الثانيه ,, و انا وصديقاتي بسرررعه ع القاعه لأنه عندنا أختبار تربيه " الله يعين " , صراحه أنا كنت خايفه شوي .. لكن الحمد لله طلع الاختبار سهل و الحمد لله حلينا زين ..

و الحصه الثالثه : رياضيات " ياحبيله الاستاذه مرره زينه أحس من حقت العام { يالطيف } " ,, و حنا بنص الحصه قاعدين نحل التمارين ,, دخلت علينا وحده من المستخدمات  , تقول للأستاذه انه عندهم اجتماع بالفسحه ,, طبعاً غدووش ما استانست ابد ..

3ـ  

لأنه اليوم عليه تدريب عملي بالمقصف .. { أشرحلكم السالفه }

عندنا بمادة التربيه لازم نسوي تدريب عملي عليه 10 درجات ,, وطبعاً الاستاذه تبي تستغلنا بأي طريقه , قامت وش سوت : قسمت الفصل 4 مجموعات " على عدد وحدات الكتاب " ,

المجموعه الاولى : فيها غدوش .. و تسوي هالمجموعه تشرح الوحده الاولى لمدة اسبوع .. طبعاً خلال هالاسبوع المجموعات الثانيه ما بتصير فاضيه فـ وشخلتنا نسوي ,,

 المجموعه الثانيه : فيها تووته .. يشيكون ع الدواليب " الخزنات " حقات الطالبات كللهم من سنه اولى الى ثالث .. يعني الدواليب اللي عليها صور و اللي مفتوحه مهب مقفله , يعني زي كذا ,, و نهاية كل يوم يعطون الاستاذه التقارير ...

المجموعه الثالثه : مجموعه دلَول .. عليهم المقصف يعني يرتبون البنات بطوابير , و يشيكون ع الاسعار وكذا .. { بس البنات , ما يلتزمون بالطابور يبهذلوونا , خاصة سنه أولى ,, الله يعين }

المجموعه الرابعه : مجموعتي أنا و دودي ,, طبعا مشؤلين عن المويه , كيف؟؟  أنه نحط علب كبيره عن بدايه كل درج من فوق ومن تحت ,, وفي المبنى الأول و الثاني كللها ,, العلب يحطون فيهن البنات قوارير المويه الفاضيه بعلبه و المليانه بعلبه ,, الفاضيه يدونها لمصنع اعادة تدوير , و المليانه نسقي به الزرع اللي بالمدرسه ,, و هكذا

طبعاً اذاخلص الاسبوع الاول,, المجموعات تتبادل الادوار و هكذا ,,, فصار من حظ غدوش اليوم انه الاسبوع ذا هي توقف ع المقصف ,

ملاحظه : عدد البنات في كل مجموعه من 8 الى 9 طالبات ,, فـ وش نسوي نتقسم كل بنتين في يوم أو على حسب ما يتفقون هم و رئيسة المجموعه  ,,

4ـ 

فـ بما أنه في اجتماع يعني تزيد الفسحه 5 دقايق تقريباً و يزيد تعب غدووش ,, الله يعينه ,, لكن ولله الحمد ,ما طولت الفسحه , يعني خف التعب ع غدووش ,,,,

آآآيييييييييييه هي اليوم شوي تعبانه لأنه " شدَت التقويم حق الاسنان " ,, { سلاامات غدوش ما تشوفين شر ,, << يوم السبت بجيبلتس عظمه هع بدال اليوم لانه ما اكلتي شي بالفسحه هع هع هع }

5ـ 

,, و مر اليوم الدراسي كالمعتاد و لكن يتخلله كالعادة ايضاً : واجبات , تسليم ملفات , اختبارات , خرايط ذهنيه ...الخ << كلل هذا في الاسبوع الجاي .. " بيلحقون قبل اجازة الحج, ولا كيف آآخ "

و رن الجرس معلناً نهايه الدوام , و بداية يوم الأربعااااااء " احلى يوم بالاسبوع " لأنه ناخذه Off  ما نذاكر به ابد ,, و تبدا المذاكره يوم الخميس ,, الله يعين ...

...

الساعه 3.48 فجراً ..

6-

رجعت من المدرسه الساعه تقريبا 1,15 .. و أخذت المضاد " اللي صرفه ليه الدكتور أمس " ,, و اكتشفت بعد ما اخذت الدواء أنه فيه " بنسلين " و أنا عندي حساسيه من هالمااده ,, يآآآآويلي .. وش أسوي ..{ المفروض الدكتور سألني عندي حساسيه ولا لا } .. 

يا الله .. طبعاً أمي خلتني اشرب مويه كثيييير " ليش ما أدري " , بس وجتني عقبَه حالة نوووم مهب طبيعي ,, نمت الى المغرب ,, امي تقوم فيني ,, عجزت أقووم بعدين جا ابوي يقومن نفس الشي ,, و ما قمت الا الساعه ,, تقريباَ 10 .. 

7-

قمت و انا احس بدوووخه و ما فيني حيل اسوي شي يالله شايله عمري .. و أمي عطتن ليمون و عسل و ما ادري وشو " طبعاَ الوصفه من جدتي الله يخليه " ,, و الحمد لله تحسنت و  طبعاً صحصحت ,, الحمد لله ,,

و جيت ابي أذاكر ابي أفتح الشنطه أسوي ملفاتي " مااالي خللللق " ,, { العمر يخلص و الدراسه و شغله ما يخلص } .. بعد مشاروات انا و نفسي قررت انه ما افتح الشنطه ,, و هي الصباح ربااااح ..

ووبس ..

المصطلحات :

ـ قاضيه : مخلصه , جاهزه

ـ يا حسره : أداة تحلطم و تحسر

ـ باطتن تسبدي : يعني قاهرتن معصصبه منه ,, تقال أعلى درجات التعصيب و القهر من شخص ما  

ـ حقات : ضمير ملكيه 

ـ عقبه : بعده .. After that

ـ استانست : فرحت و انبسطت

ـ شايله عمري : شايله نفس ,, يعني يالله اتحرك

ـ صحصحت : استيقظت نشيطة و طار عني النووم 

ملاحظه :

ـ البنسلين ماده كيميائيه تدخل في تركيب الأدويه ,, و يكون عند بعض الناس حساسيه منها " مثلي " ,, و اذا تم اخذ جرعه كبيره منها لمن عندهم حساسيه , قد تؤدي الى الوفاه ,, " الحمد لله اخذت نسبه صغيييره "

ووبس نشوفكم باتسر .. تصبحون على خيير 

تحباتي :

الدوقه / عروب 

مُذَكِراآآتْ طَـالِبَهـ ..~4 " مَا أَسْوأ أَنْ تَكُنَ مَبْسُوطَاً و تُفَاجأ بِـــ "

السلام عليكم و رحمة الله وبركاته 

اليوم :الثلاثاء .. الموافق 20/11/1432 هـ ... الساعه 3.15

اليووم .. سحبت ع المدرسة و غبت  ,

      لانه قمت اليوم الصبح و انا تعباااانه و ما فيني حيل اقوم من الفراش , لسببين الأول : ايسكريم عبد العزيز اخوي اللي أمس ,, و الثاني أنه ما نمت الا بعد الفجر ..

طبعاً ما أبي أضيع تعبي اللي امس ,, فـ وش سويت أخذت اوراق الخرايط الذهنيه وواجب التربيه المهنيه ,, و حطيتهن بظرف ,, و كتبت عليهن .. يسلم الى : غدووش , دودي , تووته ,, الفصل 3/3 .. و عطيتهن السواق ,, و صديقاتي الله يجزاهم خير  وصلوهن للأستاذه ,,, هع عارفه مشوار بس ما ابي اضيع تعبي ,,

 .. هع كان منظر اخواني وهم رايحين المدرسه يحزززن و انا بالفراش منسدحه هع هع شعور حلو انه الكلل يداوم ما عدا أنا و أخوي الصغير خخخخ و سحبتَه نوووومه .. و ما قمت الا الساعه 11 .. افطرت مع امي " الله يخليها لنا و لا يحرمنا منها "  و أخوي الصغير .. ووبس قعدت الين جو  اخواني من الدوام ,,

عاد عزوز قعد يقول لامي وابوي " ليه تخلون عروب تغيب وانا لا ,, خخ رحمته هع "

 ملاحظه: أبوي و أمي ما يخلونَا نغيب الا بالشديد القوي ..

ويوم نانمو أخواني نمت معهم << تعاطفت معهم لقيتهم كلهم نايمين الا أنا هع 

و يوم جا العصر دقيت على غدوش باخذ من الواجبات لقيته نايمه ,, و طنشت  الواجبات , قلت بنفسي

" يعني وش بيكون عندنا يعني , خلين ادق عليه اذا جيت "

 ورحت أنا و امي المستشفى عشان الزكام و الكحه ...الخ ,,  كالعاده عطاني لستتة ادويه , و عطاني عذر غياب عشان المدرسه ..

و يوم جيت و تقهويت ,, ذيك الساعه فكرت انه ادق على غدوش .. طلعت غايبه مثلي خخخخ شكلي عديته هع,  

 بعدين دقيت على دودي 

قالت لي انه : 
اليوم في المدرسه بدايه الدوام عطوهم محااااضره ,, و بالحصه الأولى : حضرت الاستاذه , و يوم وصلت عند اسمي , قالوله البنات:  أنه عروب ما بعد جت ,, قالت : أكيد غايبه لأنه الحين الساعه صارت 8 .. و كتبتني غايبه , و يوم وصلت عند اسم غدوش قالو النبات : غايبه ,,,

"طبعاً تووته و  دودي وش جا على بالهم أنه أنا و غدوش متفقين , ما درو انه ما ندري عن بعض , و يوم و صلتهم أوراقي { اللي فيها الخرايط و الواجبات } ,, درو انه محنب متفقين أنا و غدوش لأني كاتبه اسم غدوش ع الظرف "

و المصيبه الكبرى أنه طلع عندي بكره أختبار تربيه مهنيه ,, لان الاستاذه حظرته ما قالت لهم الا اليوم .. و أنا كتابي بدولابي اللي بالمدرسه ,,, بس الحمد لله أنه عندي نسخه الكترونيه ,, 

ضاق صدري انه عندي اختبار و توني ادري ,, لكن الحمد لله ما فيه واجبات ,, 

وووش بعدد .. 

آآآآآيــــــــــــــــه ,, وصلت أمس بالليل مرت عمي من بريطانيا ,, مررهـ فرحنا و جت عند بيت جدي اليوم .. 

عشان كذا بديت اذاكر الساعه 11 ,, و ما خلصت الا الساعه 3 الاربع ..  

وو الله يوفقنا و يصير الاختباار سهل ,,آآآآآآآآآآآآآآآمين 

ووبس هذا اللي صار اليوم .. و لنا غداً حكاية جديده

المصطلحات :ــ 

ــ سحبت : طنشت 

ــ الين : إلى أن

 ــ لستته : قائمة 

 ــ محنب : لسنا 

و تصبحون على خير ..

تحياتي / الدوقه : عروب 

مُذَكِراآآتْ طَـالِبَهـ ..~3 " ومَا أَدْرَاكَ مَا يَوُمُ الإِثْنَيِن"

السلام عليكم ورحمة الله و بركاته

اليوم : الاثنين .. الموافق 19 /11 / 1432 هـ 

قراء مدونتي الاعزاء << من كثرهم , لا تصدقين عمرتس بس هع

في البداية ابي اقول قرار ..

اللي هو : انه من اليوم بتكلم بالعاميه مهب بالفصحى .. و بحط فقرة " تعلمت أن " بتدوينه لحااله 

اليوم اثنين : وسط الاسبوع " ما ادري ليه دااايم طويل و غثيث " هع

الساعة 2 ظهراً:

طبعاً بديت يومي بقومه متأخر كألعاااااده لأنه أمس كالعاده ايضا ما نمت بدري ... { ما أدري متى يتعدل نومي }

و بسررعه فائقه لبست مريولي و زينت شعري ,, اييه ما علمتكم , أمس أنا و صديقاتي اتفقنا نسوي اكشن بشعورنا الا وهو . " برمة من قدام , و كعكتين من ورا " { ان شاء الله عرفتو قصدي هع ,, عارفه ما اعرف اشرح هع } , و طبعاً أنا فرقت الفرقتين و زينته قبل ما نام علشان اذا قمت بس اعدله و امشي ,,

و اخذت لي كوبي العزيز ... و اللي تصعفق بالسياره كالعاده  .. و دخلت المدرسه متأخره .. ياااكرهييييله الاستاذه حقت دفتر التوقيعات حفظتني من كثر ما تشوفن رازتن وجهي متأخره آآف ... ووقعت ,, و دخلت لحصة الفيزياء و الاستاذة عطتن نظررهـ ما ادري كيف اوصفه ,, انا وش كانت ردة فعلي ,, ابتسمت و قلتلها السلام عليكم . هي سكتت و ردت السلام على امتعاض .. هع  ,, مع ان الاستاذه حليله مررره أحبَه و أحب مادتَه ,, بس وش اسوي اذا كان قدري اني اجي كل يوم متأخر ؟؟؟

و مر اليوم الدراسي كالعاده الى أن جائت الحصة الرابعه :

حصة الإنجلش .. صار لي موقف احرااج هع .. ابقول السالفه من البدايه عشان تفهمون .. أنا لي 3 ايام منزطه و اللوز منتفخة و حراره و كحه , و حالتي حاله " الله لا يوريكم "

و ما ادري وش سلط العطاس و الاستاذه تشرح , كل شوي اعطس و عطستي الكريمه مو وحده توأم هع , يعني اعطس مرتين ورا بعض ... و عطسه ورا عطسه ما يمدي الاستاذه تقول كلمتين الا و انا عاطسه  , بعدين قالتلي بسسسس " وهي تزعق " , خلاص يكفي ,, و الفصل ماات ضحك .. أنا دوروني منحرجه و فيني الضحك ,, و ما أدري شلون هع , بس موقف ما ينسى .. { أنا وش ذنبي اذا  العطاس تسلط علي هااه }

و تدرون ليه ما اطيق يوم الاثنين ,, أعلمكم ..

اليوم كل نهاية حصه قالت الاستاذه ترا به واجب واجب خلاااص تعبت ,, استاذة الفيزياء عطتنا نحل اسئلة الوحده , و التربية المهنية تبي خريطة معرفيه و كم سؤال بعد , و الرياضيات عطتنا 3 مسائل كل وحده أطول من الثااانيه آآهـ , و الانجلش عطتنا واجب بالكتاب و تبينا نسوي خريطه ذهنيه آآخ  , و استاذة الكيمياء تبي خريطة ذهنيه آآآآخ تعبت , لا و ازيدكم من الشعر بيت .. استاذة القران تبينا تحفظ سورة الذاريات هي صح سهله بس ما ادري وش ابدَي ,,, آآآآآآآه الله يعيييين  ..

ووبس ,, اذا خلصت شغلي وواجباتي كملت لكم ..

..

السااعه  4 فجراً :

طبعاً سهرانه كالعاده ,, أنا يوم جيت من المدرسه نمت بعد ما كتبت التدوينه اللي فوق ,,,

و ما قمت الا الساعه 5 و نص العصر تقريباً ..

قمت { بعد عناااء } , و ما فيني حيل اذااكر ابد ابد ..  و قعدت فوق السرير الى المغرب ..

نزلت تقهويت مع اهلي ,, الى العشاء ,,

بعدين طلعت اذاااكر و احل ,, بديت بالفيزياء بعده التربيه المهنيه ..... الييين ,, توني مخلصه خريطة الكيمياء ,, ولله الحمد ..

ما ودي انام لأنه بقي شوي و يأذن الفجر ,, فـ نصبر شوي .. {طبعا أختي توهـ نايمه هع }

والله اني أشاور نفسي هل اداوم و لا لا ,, ما أدري لأن حلقي بدا يشَتَد " تدرون ليه لانه يوم قمت العصر والا عزوز اخوي جايب اسكريم , و انا ما اقاوم الايسكريم ,, و اكلت هع  " ,,,

,, اييييه نسيت شي ,,,

علمتكم اني " منزطة و بي كحه ... الخ " ,, انا تعبت يوم السبت ,, طيب ف يوم جا اليوم والا غدووش صديقتي تعبانه زيي ههههه صرنا سوا هع هع  

وووبس .. هذا ملخص اللي صار اليوم ..

و سوري اذا طولت هع .. نشوفكم باتسر ...

ترجمة المصطلحات :

ــ غثيث : يعني ثقيل دم و ما ينطاق 

ــ زينت : ظبطت و صلحت أو سرَحت 

ــ تشوفن : تَراني .. " بالقصيم ما نقول الياء اللي باخر الكلمات مثل : عطين : عطيني .. شوفين : شوفيني و هكذا "

ــ حليله : طيبه و حبوبه 

ــ منزطة : يعني مزكمه و كل شوي اعطس , ... الخ 

ــ تزعق : ترفع صوته بالهواش و الصراخ 

ــ باتسر : بكره ,  غداً 
ــ أبي : أريد 

ملاحظه : 

ــ حنا " نحن " عندنا عاده , انه نحط القهوه المغرب ,, ولازم تتجمع كللل العائله ,, و طبعاً يتخلل القعده , شوكلاته و حلا .... الخ 

ــ اللهجة القصيميه , وكما هو معروف ينتهي كلامنا .. ب " تس " .. مثل : 

حقتس : حقك << ولا تقال الا للأنثى 

ما عدا .. 

باتسر : بكره , غداً 

و شكراً 

تحياتي : 

الدوقه عروب 

مُذَكِراآآتْ طَـالِبَهـ .. ~1 { تعريف }

اليوم : الأحد ... الموافق : 18/11/1432هـ ... الساعة : 8,25 م

أنا عروب  , طالبه في المرحلة الثانوية " نظام مقررات " ـ علمي ـ  .. أحب السفر و أعشق القراءهـ .. كما أحب كثيراً جمع العملات .. و ركوب الخيل .

أحلم أن:

أُرضِي أمي و أبي طوول عُمري ,و أن أصبح طبيبة في المستقبل,  و أريد أن أرى اختراعاتي ناجحة تباع في الأسواق و يستفيد منها العالم بأسرهـ, و يصبح اختراعاً باسم فتاة مسلمه , و أتمنى أيضاً أريد أن أترك بصمتي في مجتمعي, و أن اخدم ديني بكل الوسائل ..

" صحيح أن أحلامي كثيرهـ .. تمتد إلى الأفق البعيد .. لكن ليس هناك شيء في العالم يصعب على الله سبحانه و تعلى فهو خالقنا و هو الذي يدبر أمورنا "

كما أنني أؤمن بـ :

1ـ أن ما أصابني لم يكن ليخطِأني , و ما أخطأني لم يكن ليصيبني .

2ـ ~| كُل فشَل مَررت به كان ضرورياً لتحقيق نجاحاتي التالية..!|~

3ـ الذكاء ليس في أن يشهد الجميع لي بالذكاء، وليس في أن أقوم بتصرفات ذكية , دائما..ا لذكاء هو أن أفهم ما أنا..

كما أنني : 

 مثل أي طالبة مقررات في العالم , أستيقظ كل صباح لأذهب إلى مدرستي الحبيبه

.. و لم انتبه في يوم من الايام , للعجائب التي تحدث في طريقي ,

 فـمدرستي تبعد عن منزلنا من 10 ــ 15 دقيقه ,, و قد تمتد الى أكثر من ذلك بسبب الزحمة و الإشارات ... الخ 

فقررت أن أكتب كل يوم { تقريباَ } ,, ملاحظاتي و الأشياء التي الاحظها في مدرستي أو في الطريق اليها أو في المجتمع حولي .. وما ذا تعلمت منها ..

ملاحظه: 

سأتحدث عن نظام المقررات فيما بعد 

تحياتي : 

الدوقه: عروب